Today I post a column by the journalist and columnwriter Bob Harms about the way the Venezuelan president Hugo Chavez is potrayed in the media. He praises the Aruban prime minister Nelson Oduber for not letting the lies told in the media keep him for expressing his admiration for Chavez' social politics.
Bob Harms in La Prensa
Un pal’i hòmber!
No ta tur biaha mi por uni mes ku pensamentunan di promé minister di Aruba, Nelson Oduber. Pero un kos ta sigur. E ta manera ta bisa den bon papiamentu, un pal’i hòmber!
Miéntras ku na Kòrsou tur hende ta bira “diplomátiko” ora nan ta papia di presidente di Venezuela, Hugo Chavez i su gobièrnu, promé minister Oduber si ta sali i para manera un hòmber pa loke e ta pensa. E loke e presidente demokrátikamente eligí di Venezuela ta hasiendo pa e klase marginá di su pais, ta kos di apresiá, punto! Inkreibel ku na aña 2006 ainda tin hende spantá pa e zumbi di komunismo. Ainda tin hende ta kana rònt den e reino ku nos ta biba aki ku pensamentu di temp’i kouchiboulo ku si un hende ekspresá palabranan di apresio pa un persona òf movementu di tendensia sosialista, e persona aki ta un komunista òf anti Merka.
Loke ètól no ta yuda ta prensa internashonal dominá pa interesnan komersial merikano. Esun ku ta limitá su mes na sigui notisia for di fuentenan manera CNN, FOX News, Venevision, etcetera lamentablemente ta haña informashon parsial i distorsioná di loke realmente ta pasa na Venezuela. Un ehèmpel klásiko ta e supuesto persekushon di periodistanan na Venezuela. Direpente prensa internashonal ta yen di informe tokante supuesto persekushon di periodistanan na e pais bisiña. Sin ku niun hende por produsí un gota di prueba verídiko, tòg ta reina e impreshon ku na Venezuela no tin libertat di prensa.
Wèl, nada ta mas leu di bèrdat. For di dia ku Chávez a sinta kasi 8 aña pasá, nunka ainda a arestá un periodista venezolano pasobra ela skibi kontra Chávez. Ta bon pa menshoná, ku grupo Cisneros, doño di medionan di komunikashon gigantesko manera entre otro Venevision i DirectTV, ta operando ketu bai for di Venezuela, sin ningun estorbo di parti di gobièrnu venezolano. Anto tur hende sa ku Venevision ta enemigu deklará di Hugo Chávez, su gobièrnu i movementu polítiko.
Loke tur hende aparentemente a lubidá tabata kon eks presidente Carlos Andres Perez si tabata pèrsigui periodistanan na Venezuela. No laga nos lubidá 1992, tempu di e gòlpi di estado frakasá ku Chávez mes a enkabesá. Desena di periodista a bai sera i hasta torturá e tempu ei pa funshonarionan di polis sekreto DISIP, bou di mando di e ‘famoso’ comandante Henry Lopez Sisqo riba órden di Carlos Andres Perez. Si, e mesun Lopez Sisqo ku a fusilá e dos sekuestradornan di e avion di Aeropostal den e mardugá dramátiko di djamars 1 di òktober 1984 na Hato. Por sierto ku Carlos Andres Perez ta e úniko dirigente polítiko, “demokrátikamente eligí” ku Sosiedat Interamerikano di Prensa (SIP) a kondena pa e manera kon e la pèrsigui periodistanan na Venezuela.
No shonnan. Si Chávez ta usa rekursonan ku suela di su pais ta produsí pa aliviá e situashon di esnan ku mas tin mester, ta kos di elogiá. Ta p’esei Dios ta bendishoná un pueblo ku rikesanan natural. No pa e grupito ku pa siglo i siglonan a prosperá ku sanger, sodo i lágrima di esnan pober. I si Nel Oduber tin e kurashi pa bisa esaki sin miedu, e ta un pal’i hòmber!
Te otro siman ku poder di Dios (Bo opinion, opservashon òf krítika ta bonbiní: bobharms@setarnet.aw )
No comments:
Post a Comment